الرئيسية
شغلنى ... شكرا
المشهد الاول :.
( لفيق فى الشارع ويتحدث الى الاب الذى يقف فى البلكونة )
الاب(فى ضيق) : أنا قطعت كل هدومك وعملتها زينة للسقف .. إكسي نفسك بنفسك ودور على لقمتك ف قلب الزبالة .
لفيق : يا بابا شغل ايه اللى عاوزنى ادور عليه دلوقتى .. انت عارف الساعة كام ؟
الاب : يا بني ربنا كريم وبيرزق الدودة فى قلب الحجر.
لفيق : ادخل نام يا بابا ... ما فيش دود بيصحي دلوقتى.
الاب: ما اشوفش وشك النهاردة الا وانت متعشق فى شغلانة
لفيق: متعشق ايه بس انت بتكلم فيشة ؟
فؤاد (يمر بجوار لفيق ): ايه ده يا لفيق انت مطرود ولا ايه؟
الاب: بس ياد انت كمان بوشك ده اللى عامل زى كيس الفشار.
فؤاد : يا عم سعيد انت ناقع لسانك فين ع الصبح
لفيق: بص يا بابا انا هاطلع دلوقتى واوعدك قبل المغربية لما العشا تدن هنزل ادور على شغل .. انا اساسا كائن ليلى
الاب: بعد المغربية مش هاتلاقى غير اصحابك الحبسجية اللى بيلفو جوانات تحت الكوبري واولهم المعفن اللى واقف جمبك ده
فؤاد : يا عم سعيد انا ساكت لك عشان خاطر ابنك
المشهد الثانى:.
فؤاد : ولا يهمك .. تعرف الدكتور بهيج اللى فاتح اجزخانة ع الناصية ؟
لفيق: اه .. كنت باخد عنده الحقنة زمان وياما تني الابرة جوا دراعى
فؤاد : عامل اعلان طالب فيه حد يشتغل عنده فى الصيدلية
لفيق : بجد يا فؤاد !! والله يبقي ليك الحلاوة
المشهد الثالث:.
(لفيق مع الاب فى المنزل)
لفيق: والدكتور بهيج شايلنى فوق دماغه وأى حاجة يجيبها لنفسه لازم يقاسمها معايا .. لدرجة انه بيقاسمنى فى برشام القلب اللى باخده
الاب : عايزك تقفش فى الشغلانة دى بإيدك وسنانك .. مش عايز صورتك تترج قدام الراجل
لفيق : ما فيش قوة هتخليني اسيب الشغل مع الدكتور بهيج دا انا بقيت ركن اساسي فى الصيدلية .. بقولك بيقاسمني اللقمة
المشهد الرابع:.
بهيج (فى غضب) : إطلع بره الاجزخانه
لفيق : ليه خير؟
بهيج : انت حد قالك تدى حقن ؟
لفيق : انا قولت اهو قرش داخل الدرج .. تخيل ان على كل حقنة بضربها باخد عليها نص جنيه .. احسب بقي كام سرنجة فى اليوم
بهيج : ويا ريتك بتعرف .. دا اخر واحد طلع يجري منك والحقنة شابكة فى عضله
لفيق : قولت له مش هايحس بحاجة هو اللى خاف وجرى
بهيج : طب والراجل اللى قليه اللى كان هايعملك محضر فى القسم ؟
لفيق: دا بقي انا قعدت ربع ساعة ادور على وريد فى دراعه عشان اديله الحقنة .. فى الاخر لما زهقت فضيتها فى بقه
بهيج : رجلك ماتخطيش هنا تانى
لفيق : طب ومين اللى هايقف فى الصيدلية من بعدى .. دا انا ستر وغطا ع الادوية
بهيج : مالكش دعوة .. انا هقفلها خالص هقلبها فرن بلدى
لفيق: طب ع العموم لو فتحت الفرن واحتجت حد يشيلك شكاير الدقيق انا معاك فى المصلحة دى
بهيج (فى غضب) : بره
