الملك الحزين و الراجل الفقير

كان فيه ملك من كتر ما عنده كل حاجه و مش محتاج حاجه زهق
و بقى مكتئب و حزين و ما فيش حد من المضحكاتيه عارف يضحكه

راح الملك متنكر و غير شكله و نزل السوق
و هناك لقى بيت فقير و فيه شمعه منورة
و راجل بيغنى و مبسوط استغرب جدا هو مبسوط ليه .....

فخبط عليه
الراجل الفقير : مين ع الباب
الملك : انا عابر سبيل
الراجل الفقير : أهلا وسهلا بضيفنا الكريم اتفضل ادخل و عزمه على الأكل وكان رغيف و حته جبنه
الملك :انت مبسوط ليه
الراجل الفقير : و ما أبقاش مبسوط ليه انا صحتى كويسه و ضميرى مرتاح الحمد لله
الملك : انت بتشتغل ايه
الراجل الفقير : انا نجار ....

الملك رجع قصره و تانى يوم أمر وزيره انه يقفل كل دكاكين النجارين
و بالليل راح لصاحبنا الراجل الفقير لاقاه منور شمعتين و بياكل بيض و فول و بيغنى برضه

الملك : ازاى انت لسه بتغني و انا سامع ان الملك قفل دكاكين النجارين ....
الراجل الفقير : و ماله انا ما سكتش دورت على شغل و اشتغلت فى دكان حلاق ....

المهم تستمر الحدوته و كل ما يشتغل فى حته الملك يقفلها له و مع ذلك احوال الراجل الغلبان بتتحسن و لسه مبسوط لحد ما قفل الدنيا كلها و راح له لقاه بيغنى برضه و قلب بيته خالص و بياكل لحمه و فراخ استغرب الملك جدا ,,,,,

و بعدها عرف ان الدنيا لما قفلت فى وش الراجل الفقير
راح يصطاد طلعت له سمكه بيفتحها لقى فيها خاتم
باعه و اشترى بيه اكل و جدد البيت
لأن ربنا هو اللى بيرزق و ما حدش بيتدخل فى رزق حد

و توته توته خلصت الحدوته .....حلوة و لا ملتوته